வாரணாசி திரைப்படம் 2 பாகங்களாக ரிலீஸ் ஆகிறதா? ராஜமௌலி கொடுத்த சூப்பர் அப்டேட்
செய்தி முன்னோட்டம்
பாகுபலி, ஆர்ஆர்ஆர் போன்ற பிரம்மாண்ட படங்களை இயக்கிய எஸ்.எஸ்.ராஜமௌலி இயக்கத்தில், நடிகர் மகேஷ் பாபு மற்றும் பிரியங்கா சோப்ரா நடிப்பில் உருவாகி வரும் வாரணாசி திரைப்படம் இந்திய திரையுலகில் மிகப்பெரிய எதிர்பார்ப்பை ஏற்படுத்தியுள்ளது. இத்திரைப்படம் 2 பாகங்களாக வெளியாக வாய்ப்புள்ளதாக சினிமா வட்டாரங்களில் பேசப்பட்டு வந்த சூழலில், பிரான்ஸ் நாட்டில் நடைபெற்ற சர்வதேச அனிமேஷன் திரைப்பட விழாவில் கலந்து கொண்ட இயக்குனர் ராஜமௌலி, வாரணாசி திரைப்படம் ஒரே ஒரு தனிப்படமாக மட்டுமே வெளியாகும் என்று அதிகாரப்பூர்வமாகத் தெளிவுபடுத்தியுள்ளார்.
படம் குறித்த அப்டேட்
அண்டார்டிகா பனிப்பிரதேசம் முதல் ராமாயணக் கடவுள்கள் வரை - ராஜமௌலி கொடுத்த அப்டேட்
இத்திரைப்படத்தின் படப்பிடிப்பிற்கு இடையே சிறிய இடைவெளி எடுத்துக்கொண்டு ஐரோப்பிய விழாவில் பங்கேற்ற ராஜமௌலி, வாரணாசி படத்தின் கதைக்களம் குறித்துப் பேசுகையில், "பார்வையாளர்கள் இந்தப் படத்தில் அண்டார்டிகாவின் உறைபனியையும், இயற்கை பேரிடர்களையும், அசாத்தியமான கற்பனை கூறுகளையும் அணுவணுவாக அனுபவிப்பார்கள். ராமாயணக் கடவுள்கள் மற்றும் இந்திய நாட்டுப்புறக் கதைகளுடன் அறிவியல் புனைகதையான டைம் டிராவல் அம்சங்களும் இதில் கலந்திருக்கும். ஆனால், இந்த பிரம்மாண்டங்கள் அத்தனையையும் தாண்டி, படத்தின் மையக்கருவாக ஒரு தந்தை மற்றும் மகனுக்கு இடையேயான ஆழமான பாசப் பிணைப்பு மட்டுமே இருக்கும்." என்று விவரித்தார்.
ராமாயண போர்
30 நிமிட ராமாயணப் போர் மற்றும் பிரியங்கா சோப்ராவின் கம்பேக்
முன்னதாக இந்தப் படத்தின் திரைக்கதை ஆசிரியரும், ராஜமௌலியின் தந்தையுமான விஜயேந்திர பிரசாத் பேசுகையில், ராமாயணக் கதையை அடிப்படையாகக் கொண்டு ராமருக்கும் கும்பகர்ணனுக்கும் இடையே நடக்கும் 30 நிமிட நீளமுள்ள பிரம்மாண்ட போர் காட்சி இந்தத் திரைப்படத்தின் மிக முக்கிய அம்சமாக இருக்கும் என்று குறிப்பிட்டிருந்தார். மேலும், 2019 இல் வெளியான தி ஸ்கை இஸ் பிங்க் படத்திற்குப் பிறகு, சுமார் 8 ஆண்டுகள் நீண்ட இடைவெளி கழித்து இந்திய சினிமாவிற்குள் நடிகை பிரியங்கா சோப்ரா மீண்டும் நுழைவதற்கான ஒரு கம்பேக் திரைப்படமாகவும் வாரணாசி அமைகிறது.
மெகா பட்ஜெட்
5 மொழிகளில் உலகளவில் வெளியாகும் இந்திய சினிமாவின் மெகா பட்ஜெட் படம்
இந்திய திரையுலகின் மிக அதிக செலவில் தயாராகும் படங்களில் ஒன்றாகக் கருதப்படும் இந்த வாரணாசி திரைப்படத்தின் படப்பிடிப்புகள் தற்பொழுது நைரோபி உள்ளிட்ட பல்வேறு சர்வதேச நகரங்களில் விறுவிறுப்பாக நடைபெற்று வருகின்றன. பான்-இந்தியா திரைப்படமாக உருவாகி வரும் இதில் மலையாள நடிகர் பிருத்விராஜ் சுகுமாரன் மற்றும் பிரகாஷ் ராஜ் ஆகியோர் முக்கிய கதாபாத்திரங்களில் நடித்து வருகின்றனர். ஒட்டுமொத்தப் படப்பிடிப்புகளையும் முடித்து, தற்போதைய அதிகாரப்பூர்வ அறிவிப்பின்படி வரும் 2027 ஆம் ஆண்டு ஏப்ரல் 7 அன்று தமிழ், தெலுங்கு, இந்தி, மலையாளம் மற்றும் கன்னடம் ஆகிய 5 மொழிகளில் இத்திரைப்படம் திரையரங்குகளில் உலகளவில் வெளியாகிறது.