"நான் தவறேதும் செய்யவில்லை": நாகசைதன்யாவுடன் வெளியான காதல் கிசுகிசுக்களுக்கு பதில் கூறிய ஷோபிதா
பொன்னியின் செல்வன் படத்தில் 'வானதி'யாக நடித்ததன் மூலம், தமிழ் திரைப்பட ரசிகர்களுக்கு பரிச்சயம் ஆனவர் நடிகை ஷோபிதா துலிப்பாளா. இவருக்கும், சமந்தாவின் முன்னாள் கணவர் நாக சைதன்யாவிற்கும் காதல் என பல நாட்களாக கிசுகிசுக்கப்பட்டது. அவர்கள் இருவரும் தெலுங்கில் ஒரு படம் இணைந்து நடித்த போது தான் இவர்களுக்குள் காதல் மலர்ந்ததாகவும் செய்திகள் மேலும் தெரிவிக்கின்றன. இதற்கு வலு சேர்ப்பது போல, இவர்கள் இருவரும் லண்டன் நகரில் எடுத்த புகைப்படம் ஒன்றும், அங்கு ஒரு உணவகத்தில் சேர்ந்து உணவருந்திய புகைப்படம் ஒன்றும் சமீபத்தில் வைரலானது. ஆனால், இது குறித்து இருவரும் பொது வெளியில் வாய் திறந்ததே இல்லை. இந்நிலையில், ஒரு தனியார் ஊடகத்திற்கு பேட்டி அளித்தார் ஷோபிதா.
"உண்மை தெரியாமல் பேசுபவர்களுக்கு பதில் கூற வேண்டிய அவசியம் இல்லை"
அந்த பேட்டியில், "இதுவரை, அழகான படங்களில் பணிபுரியும் வாய்ப்பு கிடைத்ததில், நான் மிகவும் அதிர்ஷ்டசாலி. நான் ஒரு கிளாசிக்கல் டான்சர் மற்றும் எனக்கு நடனம் பிடிக்கும். அந்த வகையில் மணிரத்னம் படத்தில், ஏ.ஆர்.ரஹ்மான் இசையில், மூன்று பாடல்களில் நான் நடித்தது, எனக்கு மிகவும் பெரிய விஷயம்". "நான் இப்போது அதில் (படங்களில்) கவனம் செலுத்துகிறேன். அறிவு இல்லாமல் பேசுபவர்களுக்கு, நான் பதில் சொல்ல வேண்டும் என்ற அவசியம் இல்லை. நான் எந்தத் தவறும் செய்யாதபோதும், அது என்னுடைய தொழில் அல்லாதபோதும், மற்றவர்களுக்காக விஷயங்களைத் தெளிவுபடுத்த வேண்டும் என்ற எண்ணமும் எனக்கு இல்லை" எனக்கூறியுள்ளார்.
