ஹூண்டாய் எலன்ட்ரா 8வது தலைமுறை கார் அறிமுகம்! புதிய வடிவமைப்பு மற்றும் ஹைபிரிட் தொழில்நுட்பம்

எழுதியவர் Sekar Chinnappan

Jun 29, 2026

01:56 pm

செய்தி முன்னோட்டம்

தென் கொரியாவில் நடைபெற்று வரும் 2026 புசான் மொபிலிட்டி ஷோவில், ஹூண்டாய் நிறுவனம் தனது பிரபலமான எலன்ட்ரா செடான் காரின் எட்டாம் தலைமுறை மாடலை அதிகாரப்பூர்வமாக அறிமுகப்படுத்தியுள்ளது. தென் கொரிய சந்தையில் அவண்டே என்ற பெயரில் அழைக்கப்படும் இந்த கார், முந்தைய மாடல்களை விட பெரிய அளவிலும், கூடுதல் தொழில்நுட்ப வசதிகளுடனும் உருவாக்கப்பட்டுள்ளது.

வடிவமைப்பு

பெரிய வடிவமைப்பு மற்றும் நவீன வெளிப்புறத் தோற்றம்

புதிய எலன்ட்ரா கார் 4,765 மிமீ நீளத்துடன், முந்தைய மாடலை விட 55 மிமீ கூடுதல் நீளத்தைக் கொண்டுள்ளது. மேலும் இதன் அகலம் 30 மிமீ அதிகரிக்கப்பட்டுள்ளதுடன், வீல்பேஸ் அளவும் 30 மிமீ உயர்த்தப்பட்டு 2,750 மிமீ ஆக மாற்றப்பட்டுள்ளது. காரின் முன்பகுதியில் டி-வடிவ பகல்நேர விளக்குகள் (DRLs), அகலமான கிரில் மற்றும் பின்புறத்தில் ஸ்போர்ட்டியர் பம்பர் ஆகியவற்றுடன் பிரீமியம் தோற்றத்தில் இந்த கார் வடிவமைக்கப்பட்டுள்ளது.

உட்புற கேபின்

அதிநவீன வசதிகள் கொண்ட உட்புற கேபின்

காரின் உட்புறத்தில் 14.6 இன்ச் தொடுதிரை இன்போடெயின்மென்ட் சிஸ்டம் மற்றும் டிஜிட்டல் இன்ஸ்ட்ருமென்ட் கிளஸ்டர் ஆகியவை இடம்பெற்றுள்ளன. இவற்றுடன் ஹூண்டாய் நிறுவனத்தின் புதிய க்ளியோ (Gleo) ஏஐ வாய்ஸ் அசிஸ்டன்ட், பேங் & ஓலுஃப்சென் ஆடியோ சிஸ்டம், டூயல் வயர்லெஸ் சார்ஜிங் வசதி, பில்ட்-இன் டேஷ்கேம் மற்றும் 360 டிகிரி கேமரா போன்ற பல்வேறு தொழில்நுட்ப வசதிகள் இதில் சேர்க்கப்பட்டுள்ளன.

என்ஜின்

என்ஜின் தேர்வுகள் மற்றும் மேம்பட்ட பாதுகாப்பு அம்சங்கள்

இந்த கார் பெட்ரோல் மற்றும் ஹைபிரிட் என இரண்டு எஞ்சின் தேர்வுகளில் விற்பனைக்கு வரவுள்ளது: 2.0 லிட்டர் பெட்ரோல் என்ஜின்: 145 பிஹச்பி ஆற்றல் மற்றும் சிவிடி (CVT) ஆட்டோமேடிக் கியர்பாக்ஸ் வசதி. 1.6 லிட்டர் ஹைபிரிட் என்ஜின்: 155 பிஹச்பி கூட்டு ஆற்றல் மற்றும் மேம்பட்ட பேட்டரி செயல்திறன் வசதி. பாதுகாப்பைப் பொறுத்தவரை, இதில் 10 ஏர்பேக்குகள் மற்றும் மேம்பட்ட ஓட்டுநர் உதவி அமைப்பான ஏடிஏஎஸ் (ADAS) தொழில்நுட்பம் வழங்கப்பட்டுள்ளது. இதன் கீழ் லேன் கீப்பிங் அசிஸ்ட், அடாப்டிவ் குரூஸ் கன்ட்ரோல் மற்றும் பிளைண்ட் ஸ்பாட் மானிட்டரிங் போன்ற முக்கியப் பாதுகாப்பு அம்சங்கள் இடம்பெற்றுள்ளன.

இந்திய அறிமுகம்

விலை மற்றும் இந்திய அறிமுகம் குறித்த விவரம்

இந்த காரின் விலை விவரங்களை ஹூண்டாய் நிறுவனம் இன்னும் அதிகாரப்பூர்வமாக அறிவிக்கவில்லை. முதற்கட்டமாகத் தென் கொரியாவிலும், அதனைத் தொடர்ந்து வட அமெரிக்கா மற்றும் பிற ஆசிய சந்தைகளிலும் இந்த கார் விற்பனைக்கு வரவுள்ளது. தற்போதைய சூழலில் இந்திய சந்தையில் எஸ்யூவி மற்றும் எலக்ட்ரிக் கார்களின் விற்பனை அதிகமாக உள்ளதால், புதிய எலன்ட்ரா காரை இந்தியாவில் அறிமுகம் செய்வது குறித்து எந்தவொரு அறிவிப்பையும் நிறுவனம் வெளியிடவில்லை.