கோலிவுட்டில் அபாரமாக நடனமாடும் நடிகைகளின் பட்டியல்
உலகம் முழுவதும் இன்று நடனத்திற்கென ஒரு நாளாக கொண்டாடப்படுகிறது. இந்த நாளில், கோலிவுட்டில் இன்று வரை, ஹீரோக்களுக்கு நிகராகவும், நடனத்தால் ரசிகர்களை வசீகரித்த, ஹீரோயின்கள் சிலரை பற்றி இதோ: நடிகை பத்மினி: 'நாட்டிய பேரொளி' என்று பெயர் பெற்றவர் பத்மினி. அழகு, நடனம், நடிப்பு என இவர் உச்சம் பெற்றிருந்தார். 'வஞ்சிக்கோட்டை வாலிபன்' திரைப்படத்தில், இவரின் நடனத்திற்காகவே ஒரு பாடல் வைத்தார்கள் என செய்திகள் உண்டு. தில்லானா மோகனாம்பாள் திரைப்படத்தில், சிவாஜி கணேசனுடன் போட்டி போட்டு நடிப்பிலும், நடனத்திலும் மெய்சிலிர்க்க வைத்தவர். ஸ்ரீதேவி: இவரை பற்றி அறிமுகமே தேவை இல்லை. தமிழ், தெலுங்கு, ஹிந்தி என பல மொழிகளிலும் கோலோச்சினார். கமலுக்கு இணையாக நடனமாடுவதில் வல்லவர், மறைந்த நடிகை ஸ்ரீதேவி.
விஜய்யுடன் போட்டிபோட்டு நடனமாடிய ரம்பா மற்றும் சிம்ரன்
ரம்பா: பல படங்களில் அசாத்தியமாக நடமாடியவர் ரம்பா. VIP படத்தில், பிரபுதேவாவிற்கு ஈடு கொடுத்து பம்பரமாக நடனமாடி இருப்பார். 'ஓ மரியா' என்ற பாடலுக்கு, ரம்பா ஆடியது இன்றும் பிரபலம் சிம்ரன்: 90களின் கனவுக்கன்னி இவர். இவரின் நடன திறமை தென்னிந்திய சினிமாவில் மிக பிரபலம். பம்பரம் போல வேகமாக ஆடுவதாகட்டும், ஒய்யாரமாக ஆடுவதாகட்டும், சிம்ரனுக்கு அனைத்துமே சாத்தியம். சாய் பல்லவி: இவர் அறிமுகமானதே, சின்னத்திரையில் நடைபெற்ற டான்ஸ் காம்படிஷனில் தான். 'உங்களில் யார் அடுத்த பிரபுதேவா' என்ற போட்டியில் பங்குபெற்று, இப்போது பிரபுதேவாவின் நடன அசைவிற்கே ஆடும் அளவிற்கு முன்னேறி இருக்கிறார். ஐஸ்வர்யா ராஜேஷ்: நடிப்பு மட்டுமின்றி, நடனத்திலும் இவர் கலக்குகிறார். ஆனால், இவரின் நடனத்திறமை இன்னும் முழுதாக வெளிவரவில்லை.
