D50: 100 கோடி ரூபாய் செலவில் உருவாகும் படத்தை இயக்கும் தனுஷ்
கோலிவுட்டின் முன்னணி நடிகர்களில் ஒருவரான தனுஷ், தறபோது 'கேப்டன் மில்லர்' என்ற புதிய படத்தில் நடித்து வருகிறார். இப்படத்தை அருண் மாதேஸ்வரன் இயக்குகிறார். மேலும் இப்படத்தில் பிரியங்கா மோகன் கதாநாயகியாக நடித்து வருகிறார். சத்யஜோதி ஃபிலிம்ஸ் தயாரிக்கும் இப்படத்தில் ஜிவி பிரகாஷ் இசை அமைக்கிறார். படப்பிடிப்பு கிட்டத்தட்ட முடிந்துள்ள நிலையில் இந்த ஆண்டு தீபாவளிக்கு வெளியாகும் என்று தெரிவிக்கப்பட்டுள்ளது. இதற்கிடையில் நடிகர் தனுஷ் தனது 50வது படத்தை தானே இயக்கவுள்ளதாக செய்திகள் வெளியாகின. சன் பிக்சர்ஸ் தயாரிக்கவுள்ள இந்த படத்தை தனுஷ் இயக்குகிறார் என்ற செய்தியை கேட்டு ரசிகர்கள் பெரும் எதிர்பார்ப்பில் உள்ளனர்.
தனுஷின் 50வது படம்
அப்படத்தில் விஷ்ணு விஷால், துஷாரா விஜயன், காளிதாஸ் ஜெயராம் என பலரும் நடிக்க உள்ளனர். இப்படத்தில் தனுஷின் சகோதரர்களாக நடிகர்கள் எஸ்.ஜே.சூர்யா மற்றும் சந்தீப் கிஷன் நடிக்கவுள்ளனர் என்ற செய்தி கிசுகிசுக்கப்படுகிறது. ஏ.ஆர்.ரகுமான் இந்த படத்திற்கு இசையமைக்கிறார். இது தனுஷின் 50வது படம் என்பதால் 100 கோடி ரூபாய் செலவழித்து தயாரிக்கிறார்கள். தனுஷ் இந்த படத்தின் திரைக்கதையை, வட சென்னையை மையமாக வைத்து அமைத்துள்ளாராம். தனுஷ் நடித்த புதுப்பேட்டை படத்தை போல இருக்குமோ என்று சிலர் யோசிக்கிறார்கள். மேலும் எப்போது வெளியாகும் என்ற தகவலுக்காக ரசிகர்கள் ஆவலுடன் காத்திருக்கின்றனர்.
