தமிழக முதல்வருக்கு பிறந்தநாள் வாழ்த்து தெரிவித்த நடிகர்கள் ரஜினிகாந்த், கமலஹாசன்
தமிழக முதல்வர் மு.க.ஸ்டாலின் அவர்களது 70வது பிறந்தநாள் நாளை(மார்ச்.,1) மிக விமர்சையாக கொண்டாடப்படவுள்ளது. இதனையடுத்து இன்று முதலே அவருக்கு வாழ்த்துக்கள் குவிந்த வண்ணம் உள்ளது. நாளை பல்வேறு நலத்திட்டங்களை கட்சியில் உள்ளோர் மேற்கொள்வதற்கான ஏற்பாடுகளை செய்து வருகிறார்கள். இந்நிலையில் சூப்பர் ஸ்டார் ரஜினிகாந்த் அவர்கள் ஒருநாள் முன்னதாகவே தமிழக முதல்வருக்கு தன்னுடைய வாழ்த்துக்களை தெரிவித்துள்ளார். வீடியோ மூலம் அவர் வெளியிட்டுள்ள வாழ்த்து செய்தியில், தன்னுடைய இனிய நண்பர், மாண்புமிகு மு.க.ஸ்டாலின் நீண்டநாள் நல்ல ஆரோக்கியத்துடனும், மன நிம்மதியுடனும் மக்கள் சேவை செய்யவேண்டும். 70வது பிறந்தநாளை கொண்டாடும் ஸ்டாலினை மனதார வாழ்த்துவதாக குறிப்பிட்டுள்ளார்.
கூட்டணி குறித்து பேச இது நேரமல்ல-கமல்ஹாசன்
ரஜினியை போல, நடிகர் கமல்ஹாசனும் தமிழக முதல்வர் மு.க.ஸ்டாலின் அவர்களுக்கு பிறந்தநாள் வாழ்த்துக்களை தெரிவித்துள்ளார். 'எங்கள் முதல்வர் எங்கள் பெருமை' என்னும் தலைப்பில் ராஜா அண்ணாமலை மன்றத்தில் நடைபெற்றுவரும் புகைப்பட தொகுப்பு கண்காட்சியினை மக்கள் நீதி மய்ய தலைவரும் நடிகருமான கமல்ஹாசன் இன்று(பிப்.,28) துவக்கி வைத்தார். அப்போது பேசிய அவர், ஸ்டாலினுக்கு தன்னுடைய பிறந்தநாள் வாழ்த்துக்களை தெரிவித்தார். மேலும், தனக்கும் ஸ்டாலினுக்கும் இடையே அரசியலுக்கு அப்பாற்பட்ட நட்பு பல காலமாக இருந்து வருகிறது. கூட்டணி குறித்து பேச இது நேரமல்ல. சீன்-பை-சீனாக போகவேண்டும். எடுத்தவுடன் நேரடியாக கிளைமேக்ஸ் குறித்து கேட்காதீர்கள் என்று கூறியுள்ளார்.
